އަބްދުﷲ ސަމީރު
މައުމޫނު އަބްދުލް ގައްޔޫމުގެ ތިރީސް އަހަރުގެ ވެރިކަން ނިމި ކެނެރީގޭ ނަޝީދު ދިވެހި ރާއްޖޭގެ ވެރިކަމާ ހަވާލު ވެ ވަޑައިގެންނެވި އިރު ރާއްޖޭގެ ސިޔާސީ އުދަރެހުގައި އިދި ކޮޅު ލީޑަރެއްގެ ގޮތުން އެންމެ އަލިގަދަ ކޮށް ވިދަ ވިދާ ހުރި ތަރިއަކީ ކުރީގެ ރައީސް މައުމޫނުގެ ކޮއްކޯފުޅު އަބްދުﷲ ޔާމީނު ކަމީ ގިނަ ބަޔަކު ގަބޫލު ކުރާނެ ހަގީގަތެކެވެ. ޑީއާރޕީ އާ އެކު ކޯލިޝަނެއްގެ ގޮތުގައި މަސައްކަތް ކުރައްވައި ރާޢްޖޭގައި ބޭއްވުނު ފުރަތަމަ ސިޔާސީ ޕާޓީތައް އެކުލެވޭ އިލެކްޝަނުން ނާކާމިޔާބު ވެ ވަޑައި ގެންނެވި އިރު، ސަބަބެއްގެ ގޮތުގައި ރައީސް މައުމޫނުގެ ވެރިކަމަށް ތިރީސް އަހަރު ވެފައި ވުމާއެކު،އެކަކަށް އެވަރު މާގިނަ ކަމުގައި ރައްޔިތުން ގަބޫލު ކުރި ކުރުން ކަމުގައި އެމަނިކުފާނު ވިދާޅު ވި ވިދާޅު ވުމަކީ އެމަނިކުފާނުގެ އިތުރުން ސިޔާސީ ތަޖުރިބާ ކާރުންނާ ޚުދު ރައީސް މައުމޫނު ވެސް ގަބޫލް ކުރެއްވި ހަގީގަތެކެވެ. އެބެފުޅުން ކޮންމެ ގޮތަކަށް ގަބޫލު ފުޅު ކުރެއްވި ކަމުގައި ވިޔަސް ރައްޖޭގެ ސިޔާސީ މަސްރަހު ދިރާސާ ކުރާ ބައެއް ފަރާތްތަކުން ބުރަވާ ގޮތުގައި ރައީސް މައުމޫނުގެ ވެރިކަމަށް ތިރީސް އަހަރު ފުރެމުން ދިޔަ ހިނދު އެމަނިކުފާނުގެ ސިޔާސީ ނަވަށް ހޮޅި ކުރި ބިޔަ ރާޅު ތަކުގެ ބަނޑު ދަށުން ދެމިގަނެވޭނެ ގޮތްތައް ހުއްޓެވެ. ޕްރޯ އެކްޓިވް އެޕްރޯޗެއް ގެންގުޅުއްވުމުގެ ބަދަލުގައި މައުމޫނު ގެންގުޅުއްވި ރިއެކްޓިވް އެޕްރޯޗަކީ އެމަނިކުފާނުގެ ސިޔާސީ ހަޔާތް ނިމި ދިޔުމުގެ ސަބަބު ކަމުގައި އެފަރާތް ތަކުން ގަބޫލު ކުރާހިނދު، ރައީސް މައުމޫނުގެ މިސިޔާސަތާ، އޭރުގެ ސަރުކާރުގައި ހިމެނި ވަޑައިގެންނެވި ބެފުޅުންގެ ތެރެއިން ފާޅުގައި އިދި ކޮޅު ހެއްދެވި ހަމަ އެކަނި ބޭފުޅަކީ ޔާމީނު ކަމުގައި ވިއެވެ. ނަތީޖާ އެއްގެ ގޮތުން މައުމޫނުގެ ސަރުކާރުން އެމަނިކުފާނު ދުރުވެ ވަޑައިގަންނަވަން ވެސް ޖެހި ވަޑައި ގެންނެވިއެވެ. ރިޔާސީ އިންތިޚާބު ނިމި، ކަން ހިނގާ ދިޔަ ގޮތާ މެދު ފިކުރުކޮށް ދިރާސާކޮށްލާއިރު ފެންނަން އޮތް ހަގީގަތަކީ ޔާމީނުގެ ބަސް ފުޅު އޭރުގެ ރައީސް މައުމޫން އެންމެ ފުރަތަމަ ވެސް ގަބޫލް ފުޅު ކުރެއްވިނަމަ އަދިވެސް ދިވެހި ރާއްޖޭގެ ވެރިކަން ކުރުމުގެ ފުރުސަތު ރައީސް މައުމޫނަށް ނުވަތަ ޑީއާރޕީ އަށް އޮތީސް ކަމެވެ. މިއީ އެމްޑީޕީ ވެރިކަން ކުރަން ފެށިވަގުތު ދިވެހި ރާއްޖޭގެ އިދިކޮޅުލީޑަރުންގެ ތެރެއިން އެންމެ ފާހަގަ ކޮށް ލެވުނު ޝަޚުސިއްޔަތަކަށް އެމަނިކުފާނު ވެ ވަޑައިގެންނެވި ސަބަބު ކަމުގައި ވުމީ ގާތް ކަމެކެވެ Read the rest of this entry »
